Asawa gi-dumog sa gidudahang ‘kabit’

Davao City – Mireklamo sa Talomo PNP, si alyas Belen, 37 anyos, nagpuyo sa Buhisan Bangkal, Davao City, human gidumog sa gidudahang kabit sa iyang bana nga si alyas Chie Chie sulod mismo sa ilang panimalay.

Sa blotter sa presinto tres, naabtan sa asawa nga si alyas Belen alas 2:00 sa kadlawon si alyas Chie Chie sulod mismo sa ilang panimalay kauban ang iyang bana.

Mibati og tumang selos ang asawa ug iyang gikompronta si alyas Chie Chie, apan mao pa hinuoy isog dayon gidumog ang biktima hangtud nga misangko sa pagpangulata.


Gidugang sa asawa nga dugay na siya makabati og tsismis sa ilang purok tali sa iyang bana ug ni alyas Chie Chie apan wala niya gipanumbaling kay nakapokus iyang panahon sa trabaho.

Hangtud nga iya na gyud naabtan sulod sa ilang balay ang gi-tsismis nga ‘kerida’ sa iyang bana ug siya pa gyud ang nabun-og sa panghitabo.

Gitambagan ang biktima nga didto i-reklamo sa barangay ang gidudahang kabit sa iyang bana.

RadyoMaN Erin Lumosbog

Facebook Comments