BACOLOD CITY – Nagpa-blotter sa pulis ang asawa sang isa ka abogado matapos natukiban nga gina-gamit ang ngalan sang iya bana sa notary public diri sa Bacolod City bisan pa nga wala na ini naga-practice diri sa ciudad.
Si Grace Diamante, 54 anyos ang edad, residente sang Villa Angela Subd., Brgy. Estefania, Bacolod City ang nagpadulong sa Police Station 2, in behalf sang iya bana nga si Atty. Aurelio Diamante sadtong nagligad nga Domingo, July 22 mga las 4:40 sang hapon agud ipa-record ang ila natukiban nga pag-gamit sang ngalan sang abogado sa Notary Public sa area sang Cottage Road sa Barangay 9, sa LTO area.
Suno kay Grace nga ila nadiskubrehan nga ang pag-gamit sang ngalan ni Atty. Diamante ang humalin pa sadtong bulan sang Abril tubtub Hulyo sini nga tuig 2018.
Pahayag ni Mrs. Diamante nga ang iya bana ang pila ka tuig na nga naga-istar sa Dumaguete City./dyHB BACOLOD
