Asawa giputlan ug ubol-ubol samtang bana gitigbas sa bukirang barangay sa Syudad sa Sugbo

Napalgan nga wala nay kinabuhi ang usa ka 40-anyos nga ginang sa may bung-aw sa sitio Katibis barangay Guba sa syudad sa Sugbo alas 10:30 sa milabayng gabii.
Nasuta nga naputol na ang ubol-ubol sa ginang nga nailhan nga si Liesyl Bordadora ,negosyante ug pagkaon sa maong dapit.
Unang gituohan nga ang kaugalingong bana ang naghimo sa krimen sanglit nakit-an sila sa ilang mga silingan nga nagtinubagay ug gituohan nga nakainom usab ni.
Apan sa gihimong follow up operation sa mga sakop sa Homicide section gahapon sa buntag napalgan usab nila ang bana nga wala nay kinabuhi nga naboak na ang ulo ug nakaangkon ug daghang tinigbasan sa lawas.
Ang bana nga namatay mao si Edwin Bordadora 37 usa ka construction worker.
Unang naka diskobre sa asawa ang kapuyo sa anak niini nga niagi sa tindahan sa biktima.
Nabantayan niini nga nagkagubot ang mga butang sa sulod sa tindahan nga maoy hinungdan nga nagduda ni nga dunay dautang nahitabo.
Nakita nalang niya ang pat-ak sa dugo sa dalan nga maoy iyang gisunod ug 10 ngadto sa 15 metros duol sa bung-aw nag buy-od ang patayng lawas sa asawa nga si Liesyl.
Sa imbestigasyon nga gihimo ni SPO2 Winston Ybañez unang nakamatikod nga dunay nagbanaw nga dugo sa dalan pipila lang ka metros ang gilay-on sa ilang pinuy-anan.
Gituohan nga pasado alas siete pa sa gabii nahitabo ang krimen sanglit usa sa mga silingan niini ang nakabati pa ug singgit nga nangayo ug panabang.
Dugang ni Ybañez nga dunay kasuko ang suspek sa mga biktika tungod sa kadaghan sa mga samad niini.
Si Edwin hapit maputol ang iyang mga bukton ug naboak na ang bagul-bagul niini samtang ang asawa nga si Liesyl naputol na ang ubol-ubol ug dunay mga tinigbasan sa lawas.
Nagtuo ang mga imbestigador nga giatangan na daan ang mga biktima sa suspek nunot sa nakitang tinigbasan sa mga sagbot sa dapit.
Nakakuha ang Crime Scene Investigation Unit nga kwarta nga iya sa biktima lakip na ang mga gipangompra niini.
Moplawom pa sa ilang imbestigasyon ang kapulisan kung kinsa ug unsay motibo sa kamatayon sa magtiayon.

Facebook Comments