Daw makadlaw nga may samo sang kakulba. Ini ang reaksyon ni Atty. Pet Milleza matapos madalahig ang iya ngalan sa ginpaggwa sang Malacanang nga ‘oust Duterte matrix.’
“Una daw makadlaw man kaw kay gahimo sila estorya kuris-kuris. Ikaduha makulbaan ka man kay ina nga announcement nangin public policy sang Duterte administration to clamp down on critics. Estorya kuris-kuris matuod ina pero kulolbaan,” ang kabahin sang pahayag ni Atty. Milleza sa interview sang RMN Iloilo.
Si Atty. Pet Milleza amo ang spokesperson sang National Union of Peoples’ Lawyers ukon NUPL sa Panay.
Suno kay Atty. Milleza, ang NUPL napundar sadtong July 2007 bilang responder sang mga abogado sa nagadamo, nagadugang, nagatingkad, nagalapad nga human rights violation sa idalum ni anay presidente Gloria Macapagal Arroyo.
Didto suno sa iya nag-umpisa ang madamo nga kaso sang extra juducial killings ukon EJK.
“In response to human rights violations, we the concerned lawyers of the Philippines organized ourselves into NUPL.”
Gin-athag ni Atty. Milleza nga wala gintukod ang NUPL sa tion lang sang Duterte administration. Sa pagkamatuod, wala pa nangin presidente si Duterte, ara na ang NUPL.
Ini baliskad sa pahayag nga ang NUPL nagagwa subong agud rumpagon ang Duterte administration.
“Working for human rights is not destabilization. Crticizing Duterte is not ousting Duterte,” ang dugang nga pahayag ni Milleza.
Suno kay Atty. Milleza, sa tion ni anay presidente Arroyo ara na ang NUPL, sa tion ni anay presidente Noynoy Aquino ara man ang NUPL kag consistent sila sa ila tindog.
Suno kay Milleza, ang ginpagwa nga matrix sang administrasyon isa ka ‘diversionary ploy’ bangud sang nakalipas nga semana nahublasan kag na-unmask ang baho sang pamilya Duterte.
Suno sa iya, nawaragwag sa media ang kagarukan, pagka-kawatan, drug protector kag drug smuggler sang pamilya Duterte.
Pahayag pa sini, indi man mapa-athag ni Duterte kon paano nag balloon ang manggad sang iya pamilya kag ginadala lang sa akig ang sabat agud indi masapubliko ang SALN sini.
Photo from web
