Aviation Security sa Laguindingan, gipasaligan nga hatagan sa ilang kaugalingon building gikan sa provincial government

Mipasalig si Gov. Bambi Emano nga hatagan og building ang kapolisan ubos sa Aviation Security Group kinsa nagbantay sa Laguindingan Airport.

Kini human masayri sa gobernador nga nanghulam lang sila og opisina gikan sa CAAP aron temporaryong himoon nga headquarter.

Matud sa gobernador, dili angay pasagdan ang mga nagbantay sa airport sa Laguindingan nga giunhan sa ilang hepe nga si Police Col. Raniel Valones ilabina nga sa matag adlaw, mokabat sa 50 ka flight ang ilang gabantayan.

Kung dunay problema nga masinati bisan sa usa lang ka flight, di lang matud pa ang kapolisan ang apektado kon dili ang tibook Misamis Oriental tungod kay naa man mahimutang sa lalawigan ang airport sa lungsod sa Laguindingan.