EB MAGALONA, NEGROS OCCIDENTAL – Patay ang utod nga lalaki sang live-in partner sang suspek nga manughilot matapos nga ginluthang sang makapila ka beses pasado las kwatro sang hapon, Nobyembre 25 sa EMI Homes, Barangay Tanza banwa sang EB Magalona.
Ginkilala ang suspek kay Alejandro Selendron alyas ‘Ely Manughilot’, 63 anyos, residente sang Hacienda San Juan 1, Barangay Balaring syudad sang Silay kag temporaryo nga nagatiner sa lugar sang insidente.
Ang mga biktima ang ginkilala naman sanday; Angelyn Magallanes, 32 anyos, live-in partner sang suspek kag residente sang Macamig 1, Barangay E Lopez syudad sang Silay, Rigor Magallanes nga utod ni Angelyn kag Wenifredo Diosto Jr, 42 anyos, residente sang EMI Homes, Barangay Tanza nga kaingod balay sang suspek.
Sa eksklusibo nga interview sang DYHB kay Police Captain Joseth Catonina, hepe sang EB Magalona PNP, antes pa man natabo ang pagpangluthang, nagbisita ang manghod ni Angelyn nga si Rigor kag naghatag ukon nag-offer pa sang ilimnon ang suspek sa mag-utod apang wala ini nag-upod sa pag-inom-inom bangud kapoy kag nagsulod ini sa kwarto para maghuluhigda.
Samtang yara sa kwarto, iya nga ginsekyar ang kwarta nga gintago sa masulod na sang isa ka tuig nga kapin sa 90 ka libo ka pesos (P90,000) kag iya natukiban nga 23 ka libo ka pesos (P23,000) na lang ang nabilin kag ang nakahibalo sang amo nga kwarta kag ginataguan ang iya man lang live-in partner nga si Angelyn. Bangud sa nadiskubrihan, dire kag nagkumpruntahanay si Ely kag Angelyn kag wala nag-intindihanay rasun nga nag-intra si Rigor nga utod ni Angelyn.
Dugang ni Police Major Catonina, nagkuha si Rigor sang sundang kag ginhanaan nga bun-on si Alejandrino apang ini ang nakalikaw kag nagsulod sa kwarto kag nagkuha sang armas luthang nga ginatago (9mm pistol). Dire gin-paandaman niya si Rigor nga “sige subol” kag ginhambalan man siya ni Rigor nga “sige palukpa”, bangud nagpalangdulom ang panulok kag na-impito ang suspek, iya gintiro ang biktima nga naigo sa paa kag abaga kag gindeklarar nga patay pag-abot (DOA) sa Provincial Hospital sa syudad sang Silay.
Natiruhan man ni Ely ang iya nga live-in partner nga si Angelyn kag na-igo sa naidalom nga bahin sang iya nga gusok kag nasalabat man dire si Wenifredo Diosto Jr. nga yara sa iya nga puluy-an sa tabok lang nga balay sang mag live-in partner. Ang duha ang padayon nga ginabulong sa ospital.
Samtang, detinado karon sa custodial facility sang EB Magalona Police Station ang suspek nga si Ely matapos naaresto sang otoridad.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
