Babae gidagmalan sa iyang mga kauban sa trabaho

26

Davao city – Daw nawingig ang dagway sa usa ka 25 anyos human sumbaga ug
sagpaa sa duha niya ka kauban sa trabaho nga iyang gikompronta gumikan sa
paglibak batok kaniya.

Midangop sa Buhangin Pnp si Jonalyn Senoron, dunay live-in partner, usa ka
communication specialist, ug nagpuyo sa San Antonio, Buhangin District,
dakbayan sa Dabaw aron ireklamo ang gihimo sa iyang mga kauban.

Ang biktima nakatilaw sa kinumo ni Cherie Mae Escalar ug sagpa gikan ni
Jenalyn Ocena ug pulos mga kaubananan sa trabaho ni Senoron.

Base sa blotter sa Buhangin Pnp nga miadto ang biktima sa balay ni Escalar
sa may Sta.Teresita sa may Cabantian Buhangin aron klarohon ang iyang
gikatag nga isyu batok sa iyang ka live-in nga si Mark Anthony Eyo
alas-2:30 sa kadlawon.

Apan imbes nga mutubag sa panukmat sa biktima mi-ulbo ang kasuko ni Escalar
ug kalit na lang siya gisumbag sa suspek ug miapil sab og sagpa si Ocena
kaniya.

Gitambagan karon sa Buhangin Pnp ang biktima nga ipaabot sa barangay ang
iyang reklamo aron didto sila husayon ug kung dili mahusay ang ilang bangi
hayan basin musangko sa korte ang ilang away.

RadyoMaN Joel Viray

Facebook Comments