Babaye nailad sa cellphone

35

Davao City – Midangop sa buhatan sa kapolisan sa Talomo si alyas ‘Mara’, 20 anyos, residente sa Catalunan Grande ning siyudad human nailad sa usa ka suspek sa dihang nipalit kini og cellphone.

Sumala pa niini nga bandang alas-6:00 kagabii nisulod siya sa usa ka mall sa Matina Crossing aron nga mopalit og bag-ong cellphone apan sa iyang pagpamili giduol siya sa usa ka lalaki ug gihanyagan kini og cellphone nga mokantidad og 1,200 ka pesos.

Tungod kay interesado ang biktima iya kining gipalit ug sa pagdawat sa suspek sa maong kantidad, dali kining milakaw palayo ug wala na nakita.

Sa paglili sa complainant usa ka baga nga papel ra diay ang sulod sa maong sudlanan sa cellphone dayon dali siyang miduol sa buhatan sa kapolisan sa Talomo diin nakompirma ang panagway sa lalaki pinaagi sa rogue gallery.

Ang suspek naila nga si Larry Magno Jagunos nga residente sa Purok 9 Brgy. 5-A, Upper Madapo ning siyudad.

Kapolisan naghimo na og follow-up investigation aron dakpon ug patubagon sa iyang hinimoan.

RadyoMaN Paul Canono

Facebook Comments