Babaying nalumos sa Bansalan walay foul play

Davao City – Gikumpirma sa Bansalan Municipal Police Station (MPS) nga walay foul play ang pagkalumos-patay sa usa ka babayi sa sapa sa Purok Maypalad, Barangay Rizal, Bansalan, Davao del Sur alas 12:30 sa udto niadtong Nobyembre 18, 2022.

Sa interbyu sa DXDC RMN Davao kang Patrolman Jover Rigor, personahe sa Bansalan MPS, gibutyag niini nga usa na ka senior citizen ang biktima nga taga-Barangay Barayong, Bansalan.

Sa inisyal nga imbestigasyon, usa ka estudyante ang padulong sa usa ka tindahan ug pag-agi sa sapa, nasimhutan ang baho ug didto na niini nasuta ang patay’ng lawas sa biktima.

“Ang kuan (ingon) nila, hilig man gud daw ‘to mamingwit. Mao ‘to nga wala nabantayan, nalumos ‘to siya kay kulang man pud ‘to sa pangisip gud,” saysay sa pulis.

Sulti sa pipila ka mga residente nga taas ang tubig sa maong sapa tungod sa kusog nga pag-ulan pila ka adlaw una nakaplagan ang biktima.

Nagpahimangno ang kapulisan sa katawhan nga kanunay nga imonitor o bantayan ang mga miyembro sa pamilya ilabi na kadtong adunay mental challenges.



RadyoMaN Kirby Manzon

Facebook Comments