Kalibo, Aklan – Kapin sa P 88,000.00 pesos nga balor it mga alahas rong nabuoe it manakaw matapos nga sundlon rong sangka panimaeay kaina it aga-aga sa Osmeña Avenue, Estancia, Kalibo, Aklan.
Sa blotter report it Kalibo PNP nga kaina it mga ala 1:05 rong aga-aga hay nakabaton sanda it tawag halin kay Gemma Cuenco Ambito, 40-anyos ag residente it nasambit nga lugar nagapangayo it police assistance bangud nga ginsueod it manakaw ro andang baeay.
Insigida nga nagresponde ro mga miyembro it Kalibo PNP sa pagpanguna ni PSMS Cyrus Alp Parce kaibahan ro KAP members agod nga i-verify ro nasambit nga report pero pag-abot nanda sa lugar hay nakapaeagiw eon rong suspek sa indi masayuran nga direksyon.
Sa inisyal nga imbestigasyon naga guwa nga basi sa alegasyon it biktima ag tagreklamo nga samtang una imaw sa sueod ko andang kwarto hay nakabati imaw imaw it sangag halin sa pwertahan ko andang comport room.
Ko una hay ana eamang raya nga ginbaliwala bangud nga sa anang isip hay ro anang asawa nag-abot halin sa hospital pero ko ulihi imaw ra hay nag duda.
Ana nga gin check ag anang nakita ro sangka uwa makilaeang eaeaki nga sa anang pagbana-bana naga pang edaron it 30 hasta 40 anyos, mga 5’6” ro anang kataason, nakasukson it T-shirt, short ag naka kaeo nga nagalinibot sa sueod it andang baeay.
Nag-adto imaw sa terrace ko andang baeay ag nag sinngit para nga mabati-an ko andang kaeapit pero rong suspek hay dali-dali nga pumanaw ag naeagiw sa indi masayuran nga direksyon.
Sa pagpadayon ko imbestigasyon nakita nga ginsamad it suspek ro pod-luck it andang music room para makasueod ag ginbuoe ro mga masunod; 1 gold bracelet, 2 kulintas, 2 ka gold ag white gold nga sing-sing.
Samtang ginpahayag man ni Michael Ambito, asawa ni Gemma nga samtang imaw naga tikang pauli halin sa Panay Health Care Hospital habatian nana ro pang singgit ko anang asawa ag dayon nga nakita rong sangka eaeaki nga naka puea it T-shirt halin sa kilid ko andang baeay nga naga dali-dali nga nagsakay sa Smash Motorcycle ag nagaeagyo paadto sa Banga nga direksyon.
Sa makaron hay padayon pa ro ginapatigayon nga imbestigasyon it mga kapulisan partikular rong Theft and Robbery Section it Kalibo PNP para sa masadig nga pagka aresto it suspek.
