Bag-ong nakagawas sa presohan, patay human misukol sa drug buy bust ops

Patay ang suspetsado nga tigpayuhot sa illegal nga droga sa gilusad nga joint buy bust operation sa kapulisan nga gipangunahan sa mga sakop sa  Regional Special Operation Unit Region 10 alas 8:40 ang takna kagabie sa may Zone 6 B Barangay del Carmen ning syudad sa Iligan.

Ang suspetsado nailang si Armando Tenchavez, hingkod ang pangidaron, ug residente sa Purok 1 Barangay Saray ning syudad.

Sumala sa mga otoridad, nga maoy unang mibunot sa iyang magnum .22 caliber pistol ang suspetsado, dihang nasayran nga pulis ang iyang ka transaksyon.


Swerte nga wala maigo ang arresting officer ug mibalos kini ug pusil sa maong suspek diin naka angkon kini ug duha ka mga igo sa bala, usa sa dughan ug usa ka kuto-kuto hinungdan sa iyang hinanali nga kamatayon.

Sa pagsusi sa SOCO, nasuta nga nakapabuto ang suspek sa dala niya nga armas.

Nakuha usab gikan sa iyang pitaka ang usa ka pakete sa gituohang shabu ug didto pod sa iyang bulsa ang buy bust money nga 500 pesos.

Nasayran nga bag-uhay lang kini nakagawas sa presohan ang maong suspek nga unang nasikop sa mga otoridad niadtong 2017 gumikan gihapon sa pagpayuhot sa illegal nga droga.

Ang patayng lawas sa suspek ang anaa karon sa Mary Venus Funeral Homes sa . (RadyoMan Junrey Ochea, RMN Iligan)

Facebook Comments