Bagyo Ompong mas nagdasig

Mas nagdasig ang lakat sang Bagyo Ompong (Mangkhut) pero namentenar sini ang iya kabaskugon.

Suno sa 5:00AM, 13 September 2018 update sang PAG-ASA, nakit-an ang mata/sentro sang Typhoon Ompong sa kalayu-on nga 855 km East sang Virac, Catanduanes.

May kabaskugon ini sang hangin nga nagalab-ot sa 205 kph lapit sa tunga kag pagmadlos nga nagalab-ot naman sa 255 kph. Pa-west ang giho sang bagyo sa kadasigon nga 30 kph.


Dugang pa sang weather bureau, ginalauman nga maga-landfall ang bagyo sa norte nga bahin sang Cagayan sa maabot nga Sabado sang aga, September 15.

Ginpaidalum na sa signal number 1 ang mga masunod nga lugar: Cagayan, Isabela, Kalinga, Mt. Province, Ifugao, Nueva Vizcaya, Quirino, Aurora, Quezon lakip na ang Polilio Island, Camarines Norte kag Sur, Albay, Sorsogon, Catanduanes, Burias kag Ticao Islands, Northern Samar.

Bantayan ang madason nga severe weather bulletin sang PAG-ASA karon, las-11 sang aga. -RCSG/iFM Bacolod

Facebook Comments