Bakuna vs tipdas ilusad sa mga tulunghaan

48

Davao City – Anaa sa 250,000 ka mga estudyante ang target karon nga mabakunahan sa Department of Health (DOH) Davao Region alang sa ipahigayong school-based immunization program nga sugdan sa bulan sa Agosto ug unahon ang Sta. Ana Elementary School.


Sumala ni Dr. Janis Olavides, National Immunization Program Manager sa DOH, karong bulana padayong ginapahigayon ang Parents-Teachers Association Orientation labot sa pagpasabot sa importansya sa bakuna tumong nga makuha ang pagtugot sa mga ginikanan nga mabakunahan ang ilang mga anak aron malikay sa sakit nga tipdas.

Gikanayon ni Olavides nga ubay-ubay na ka mga ginikanan ang misugot nga pabakunahan ang ilang mga anak karong tuiga nunot sa nahitabong dengvaxia scare sa milabay’ng tuig gumikan usab sa pagpaningkamot sa mga health workers.

Gani miresulta kini sa 86% nga napabakunahan na sa bulan sa Marso 2019 ug naglaum nga mosaka kini sa 95% pinaagi sa School-Based Immunization Program.

Samtang giila sa DOH ang lima ka mga measles hotspot sa syudad sa Davao partikular ang Talomo Central, Talomo North, Buhangin, Agdao, ug Distict A.

Sa datos sa DOH gikan Enero 1 hangtod Hunyo 29 karong tuiga, nakatala og 1,069 ka mga kaso sa tipdas dinhi sa Davao region diin mikunhod kini og 13% kun itandi sa milabay’ng tuig diin 14 ang namatay samtang 9 niini gikan sa syudad sa Davao.

RadyoMaN Jason Amisola




Facebook Comments