BAGO CITY, NEGROS OCCIDENTAL – Wala na nakalab-ot pa sa bag-ong tuig ang isa ka small planter matapos nga ini ang gin-kawatan na gintiro pa kag napatay sini gid lamang nga kaagahon sa Brgy. Napoles, Bago City.
Nakilala ang biktima nga si Jimmy Erespe, 64 anyos, isa ka pensioner kag residente ang Purok Maligaya, Brgy. Napoles, Bago City.
Suno sa imbestigasyon sang Bago City Police Office may mga la 1:30 kaina sang kaagahon ang balay sang biktima ang ginsulod sang tatlo ka mga suspek pinaagi sa pwersa nga pag-guba ang sang kandado sang main door sang ila balay.
Pahayag sang asawa sang biktima nga sang pagsulod sang mga suspek, una nila nga ginkadtuan ang 2nd floor sang balay kon diin ato didto ang iya bata nga lalaki.
Ginkuha sang mga suspek ang duha ka cellphone sang iya bata, gintayaan ini sang armas kag ginsugo nga itudlo sa ila ang kwarto sang iya mga ginikanan nga nahamtang naman sa idalum ukon sa ground floor.
Sa kwarto kon diin yara ang biktima kag ang iya asawa, gintayaan man sila sang suspek kag nagdemanda sang kwarta gani ginhatag sang asawa ang iya cash nga P13,500 pesos.
Wala pa nakuntento ang mga suspek, ila pa gid ginpangitaan sang kwarta ang biktima apang sang ini ang nagpadulong na sa aparador nga nahamtangan sang iya ginatago nga kwarta kag antes pa man niya nga nakuha ini, gintiro na siya sang isa sa mga suspek.
Naigo sa iya ulo ang biktima nga amo naman ang gintunaan sang iya gilayon nga kamatayon.
Nag-agi ang mga suspek sa likod sang garahian sa diin ila naman pinangpatay ang duha ka mga ido.
Nagpalagyo ang mga ini paagi sa pagtaklas sa steel gate sakay sa ila motor kag van nga nakapark nga 50 metros halin sa puluy-an sang pamilya Erespe./dyHB BACOLOD
