BACOLOD CITY – Nasapwan nga naga-utaw utaw kag patay na ang isa ka lalaki sa baybayon sa area sang Bredco Port, Brgy. 2, ciudad sang Bacolod pasado las 8 sini gid lamang nga aga.
Nakilala ang biktima nga si Joselito Occeño, 58 anyos, kasado kag pumuluyo sang Purok Mabinuligon, Brgy. 19, Bacolod City.
Suno sa asawa ni Joselito nga si Anabelle, ang iya bana ang nagabaligya sang bisaya nga manok sa area sang Burgos Public Market.
Pahayag sang asawa nga sa tagsa ka Lunes, Miyerkules kag Biernes ukon MWF ang biktima ang nagakadto sa Bredco ukon sa lugar diri nga ginatawag Cambodia agud nga magpaligo kay ini ang may arthritis.
Pasado las 7 kaina sang aga sang naglakat ang biktima sa Bredco kon nagpaalam pa ini sa iya mga apo.
Nakibot na lamang sila suno sa asawa sang may nagpabalo sa ila nga nasapwan na nga patay ang iya bana.
Wala man nagapati ang pamilya nga may foul play bangud wala ini sang pilas kag suno sa ila posible ini ang nakadanlog gid lamang.
Apang, apesar sini, nagdesisyon ang pamilya nga ipaidalum sa autopsy ang bangkay sang biktima./dyHB BACOLOD
