RMN Laoag – Bangkayen idi makitada ti mapukpukaw a lalaki a ni Herminio A. Turon, 46, taga barangay Virvira iti ili ti Carasi, Ilocos Norte.
Basar ti duktal ti PNP, Disyembre 18 ti naglabas a tawen pay a mapukpukaw isuna sigun ti ulitegna a ni SPO4 Garcia Turon. Kinunana a nabayagen a birbiroken ti pamilyana ket awan pay ti mensahe nga imbatina kas kuma ti text iti cellphone wenu surat sakbay a pimmanaw.
Nabirokan daytoy ti agnagan Benedick Tolentino, caretaker ti Arabica Coffee plantation paset ti nagbaetan ti Carasi ken ili ti Piddig, 14 kilometro ti kaadayuna manipud ti balayda. Dagus a nagturong dagiti pannakabagi ti Army CAFGU detachment, opisyales ti barangay ken ili ken ti ulitegna. Ditoy a nakompirmaran a ni Herminio Turon daytoy.
Ti inisyal nga imbestigasyun, rumrumuar a natnag ni Herminio iti bantay bayat a daldalyasatenna iti nasao a lugar. Awan met ti makita a ‘Foul Play’ ti PNP ti napasamak.
Bernard Ver, RMN News
