Kalibo, Aklan – Sambilog rong patay ag 2 rong ninahan matapos nga matabo rong aksidente kabii sa national highway it Brgy. Linabuan Norte, Kalibo, Aklan.
Rong namatay nakilaea kay George Victoriano Jr., 25-anyos residente it Mambog, Banga samtang rong mga ninahan hay nakilaea kanday Ronilo Victoriano, 30-anyos, residente man it Mambog, Banga ag Jayralph Reteo, 26-anyos it Fulgencio, Balete.
Sa imbistigasyon it Kalibo PNP naga guwa nga halin sa banwa it Kalibo ag nagapauli sa Banga ro magmanghod nga Victoriano tag mahueog rong helmet ni George sa karsada.
Ana raya nga gin inadwing hasta nga ro anang gina maneho nga motorsiklo hay haadto eon sa pihak nga lane ag sa anang pagtingkaaw bumunggo ra sanda sa kasubeang nga truck.
Rong truck hay halin sa banwa it Altavas ag paadto man it Kalibo nga ginamaneho ni Almir Castro Almine, 31-anyos it Poblacion, Altavas.
Bangud sa mabaskog nga impact hay anda pa gid kara nga nahasunggaban si Reteo nga nagapaadto man it Banga sakay it anang motorsiklo.
Madasig n ga gin respondehan it mga rescuer ag kapulisan rong insidente ag gindaea sa Aklan Provincial Hospital rayang magmanghod nga Victoriano pero ginbawian it hueam nga kabuhi si George bangud sa mga grabeng lastro samtang si Ronilo hay padayon mat-a nga ginabueong ag si Jayralph sa sa St. Jude Hospital.
Sa makaron hay nagapadayon pa rong imbestigasyon it mga kapulisan angot sa nasambit nga aksidente.
