Bansalan road crash: duha patay, usa angol

161
Davao City – Pahugtan pa sa Bansalan Municipal Police Station (MPS) ang pagmonitor sa mga motorista sa lugar pagsigurong malikayan ang disgrasya sa dalan, human nga duha (2) ang patay sa nahitabong disgrasya tali sa duha ka motor sa Purok Banikanhon, Barangay Poblacion Dos, Bansalan, Davao Del Sur, alas 4:10 sa hapon niadtong Domingo (Mayo 22, 2022).

Sa interbyu sa DXDC RMN Davao kang Police Major Jeffmar Tercero, Office in Charge (OIC) sa Bansalan MPS, giila niini ang mga biktima ug driver sa motor nga si James Laroa, 19 anyos, residente sa Purok Maligaya, Sampaguita, Poblacion Uno, Bansalan, Davao Del Sur. Samtang, ang usa ka motor gimaneho sa usa ka Zosimo Velos, 47 anyos residente sa Purok Rizal, Lower Mabunga, Bansalan Davao del Sur ug angkas niini si Kimboy Egos, 23 ayos, residente sa Malita, Davao Occidental.

Sa inbestigasyon, padulong Bansalan Poblacion ang motor nga gimaneho ni James Laroa, samtang, padulong Balutakay ang motor nga gimaneho ni Zosimo Velos sa dihang nagbangga ang duha ka sakyanan. Tungod sa kakusog sa impact, grabe ang danyos sa duha ka motor samtang dead on arrival ang duha ka driver ug naangol ang usa ka back rider diin nasayrang ang tulo walay mga helmet.

“Dead on arrival ang duha (ka biktima). So, meaning paspas gyud ang padagan. It’s either one of them is paspas ang dagan. Paigtingan nalang natin ang ating traffic regulations para hulihin ang patuloy na mabilis magmaneho,” sulti ni Tercero.

Ginahulat pa usab karon ang desisyon sa duha ka kampo kung muduso ba sila og kaso o magbaton na lamang og settlement.

RadyoMaN Kirby Manzon

Facebook Comments