Barangay Fatima Kapitan Curit gikadismaya ang paglambigit sa droga sa usa ka police nga naasign sa Fatima Police Station

18

General Santos City–Gibutyag ni Brgy. Fatima Kapitan Rey Curit nga dakong tamparos sa han-ay sa kapulisan partikular na sa Fatima PNP kung asa usa sa mga personahe ang nagpositibo sa gipahigayong random drug test sa PRO-12 niadtong milabay nga bulan.

Sumala pa ni Curit nga dismayado siya sa gihimo sa usa ka pulis nga unta grabe ang ilahang koordinasyon sa kapulisan sa kampanya batok droga aron lang mahinlo ang maong Brgy. apan gihugawan lamang niining pulis.


Gani gipaklaro sa opisyal nga wala na untay rason nga maghimo pa ug kabuang ang kapulisan gumikan kay wala nagkulang si Pangulong Rodrigo Duterte sa mga pulis ug gidoble pa niini ang ilang mga sweldo.

Saysay usab ni Kapitan Curit nga maoy hinungdan nganong negatibo man usab ang panglantaw sa katawhan ngadto na sa kapulisan gumikan sa gihimo sa pipila nila nga kaubanan nga dili maayo sa ilang trabaho.

Pamahayag man usab sa kapitan nga tinuod gayud ug dili tsismis lang ang iyang nadawat nga impormasyon gikan sa mga sibilyan nga dunay pipila ka mga pulis ang nagahimo ug kabuang sa ilang trabaho sama sa gihimo sa usa ka pulis sa Fatima PNP.

Gihingusgan usab niini nga dapat doblehon pa ang ipahamtang nga silot sa maong pulis gawas nga matanggal pa sa trabaho, pasakaan usab ug kasong criminal.

Facebook Comments
From Advertisers