Human ang kapin duha ka semana, nabalhog kagahapon sa city jail sa Barangay Tipanoy, ning dakbayan sa Iligan ang usa ka barangay kagawad kinsa nasikop atol sa usa ka buybust operation niadtong Agosto 26, sa may Barangay Tomas Cabili ning dakbayan.
Kini tungod kay nag-waiver og napulo ka adlaw alang sa iyang preliminary investigation si Jamale Cali, kinsa nailang Kagawad Jam Cali, sa Barangay Upper Hinaplanon.
Mga kasong pagpamaligya ug paghupot sa ginadiling droga nga paglapas sa Comprehensive Dangerous Drugs sa Republic Act 9165 ang giatubang ni Cali.
Gitugutan kini sa korte nga makapiyansa sa kantidad nga 200 mil pesos alang sa Section 11 o paghupot sa ginadiling droga, apan walay piyansa nga gitugot sa selling o pagpamaligya.
Kung kahinumduman, gibana-banang moabot sa tulo ka gramo ang nakuhang shabu sa posesyon kang Cali sa operasyon sa Regional Drug Enforcement Unit o RDEU 10 nga adunay gibana-banang market value nga 50 mil pesos.
Miingon si Police Lt. Col. Gerardo Ulanday, hepe sa RDEU 10, si Cali nalakip sa listahan ni Presidente Rodrigo Roa Duterte o PRRD drug watchlist. (Divina Suson)
