General Santos City–Walay nahitabong failure of elections sa tanan nga barangay sa tibuok Region 12, atol sa pinilay sa nakalabayng Lunes, kini ang gikalipay ni Gen. Marcelo Morales, ang labaw sa kapulisan sa Rehiyon 12.
Sumala ni Gen. Morales nga alang kaniya kini ang labing maayong balita sa Rehiyon 12, nga may kalabutan sa gipahigayong eleksyon sa barangay ug Sangguniang Kabataan.
Matud ni Morales nga bisan pa man ang mga lugar nga una na nilang gikonsiderang kritikal ug nabutang sa hotspot, walay nahimong problema og nahimong hapsay ang pagpili sa mga botante.
Dugang pagbutyag ni Gen. Marcelo Morales nga wala usay nahimong babag sa pagpahigayon ug eleksyon mga lugar kung asa una nang miatras ang mga magtutudlo nga magsilbi unta nga BEI.
Matud sa Heneral nga nahinayon man gihapon ang eleksyon pinaagi sa tabang sa kapulisan gikan sa Rehiyon 12 nga maoy mihulip sa mga magtutudlo isip mga Board Of Election Inspectors.
Duna may igong kasayoran ang nahisgutang mga pulis gumikan daan naman silang miagi ug trainings ingon man seminar sa Comelec kalabot sa eleksyon. (Jordan Britos)
