Batan-on nga taga-Barangay Lacson giingong gidagit niadtong Sabado

Davao City – Gidagit sa wala mailhing suspek o mga suspek nga nakasakay og SUV ang usa ka batan-ong lalake nga taga-Barangay Lacson, Calinan, niadtong Sabado sa hapon.

Sa interview sa DXDC RMN Davao sa amahan nga si Jesus “Budok” Espinosa, gibutyag niini nga nananghid ang iyang anak nga si Kenneth Espinosa, 19 anyos nga dunay pakigkitaan nga bag-ong amigo nga iyang na-ila-ila sa Facebok aron kuhaon ang rabbit nga ihatag kaniya apan pag-abot sa Purok 1 sa highway sa Barangay Lacson kalit lang gibira ug gipasakay sa wala mailhing suspek sa SUV ang biktima.

Ang maong pagpadagit na-videohan sa nakakita sa panghitabo diin gihulagway ang suspek nga nagsuot og bonnet ug shades maong wala maklaro ang panagway sa suspek.

Segun sa amahan, human mapasakay ang iyang anak mibalik sa agi ang SUV ug hangtud karon dili na ma-contact ang cellphone number sa biktima ug wala sa’y abductor mitawag kanila hangtud ning pagbalita.

Gipamugos sa amahan nga inosente sa bisan unsang dautang buhat ang iyang anak ug gani ang mga barkada lamang niini mga classmate ra usab niini ug walay nahinumdoman ang amahan nga dunay kalaban o nakontra aron dagiton ang iyang anak.

Nanghinaut ang amahan nga mabalik kanila nga usa pa ka dakong buhi si Kenneth Espinosa uban sa panawagan sa kapulisan sa Calinan nga makita ang iyang anak ug madakpan ang abductor.

RadyoMaN Joel Viray

Facebook Comments