Davao City – Nagapadayon sa pagkakaron ang pag-apud apud sa cash cards sa mga public school teachers kinsa nanerbisyo isip Board of Electoral Inspector (BEI) sa nagmalampusong synchronized Barangay ug Sangguniang Kabataan Elections.
Kini maoy gibutyag ni COMELEC-XI Regional Election Spokesperson Atty. Krisna Samantha Caballero atol sa pakighinabi sa DXDC News Team kaniya diin giklaro niini nga nakapanghatag na sila og cash cards sa ubang probinsiya ug karong adlawa gi-atiman na nila ang honoraria sa BEIs dinhi sa Davao.
“Ang pag release sa cash card dili dayon-dayon kay naa tay ginaagian na process usa na niana sa atong payroll and daghan na siyag paper works so right now sa Davao City ginaprepare na siya and anytime soon ipang apod-apod na,” segun niini.
Ubos sa balaud, modawat og P6,000 nga honoraria ang chairperson of the electoral board; P5,000 kada board member; P4,000 matag DepEd supervisor ug P2,000 sa support staff ug tanan sila adunay P1,000 nga madawat nga travel allowance.
Kahinumduman nga giingon ni Jenielito Atillo, tigpamaba sa Department of Education (DepEd) XI nga mokabat sa 3,000 ka public school teachers ang ilang gideploy isip electoral board members sa nasangpit nga eleksyon.
RadyoMaN Jason Amisola
