Gin-athag ni Bacolod Vice Mayor EL Cid Familiaran nga wala pa nabakal ang Vitamin C with Zinc nga gin-alegar ni Councilor Wilson “Jun” Gamboa nga nagabalor sang P2,500 ang isa ka botelya.
Sa interview sang DYHB kay Vice Mayor Familiaran, ginpahayag sini nga sang nagligad lang nga Sabado sang nag-alokar sang pondo ang Sangguniang Panlungsod para sa pagbakal sang bitamina. Gin-athag man sang bise-alkalde nga indi per bottle ang tuyo nga baklon sang ciudad kundi per box.
Madumduman nga sa special session sang city council, ginkwestyon ni Gamboa ang balor sang nasambit nga vitamins sa diin nagpakita ini sang ginbakal niya nga sample nga nagabalor lang sang P349.
Nahibaluan nga plano sang ciudad nga ipainom ang Vitamin C with Zinc sa mga COVID-19 positive sa ciudad.
[image: image.png]
