Davao City – Paspas nga miresponde ang mga sakop sa Bureau Of Fire Protection (BFP)sa lungsod sa Mawab ingon man ang mga sakop sa Nabuntura Fire Station alas-4:00 ang takna sa kadlawon human nasunog ang usa ka bodega sa may Prk. 4 Brgy. Poblacion, Mawab, Compostela Valley.
Sumala sa report nga nahipos gikan sa Mawab Fire Station, nasayran nga ang bodega gipanag-iyahan sa usa ka Cesar Baraclan Jr., hamtong ang panuigon, ug residente sa nahisgutang lugar.
Matud pa nakadawat og tawag ang mga bombero gikan sa mga residente hinungdan nga paspas nga miresponde apan tungod sa kakusog sa kalayo paspas nga nasunog ang mga klase-klaseng mga paninda sulod sa bodega hinungdan sa pagkasunog nga mikabat ngadto sa P7-M.
Migula sa imbestigasyon sa mga owtoridad nga upos sa sigarilyo nga napasagdan ang hinungdan sa maong sunog.
Gani nagpahimangno ang mga sakop sa Mawab Fire Station nga likayan ang paglabay sa mga upos sa sigarilyo sa mga lugar nga daling masunog aron malikay sa trahedya.
RadyoMaN Juls Catisay
