Davao City – Dead on arrival ang usa ka Brgy. Kagawad kinsa gipusil-patay alas 10:45 sa buntag kaganina, Hunyo 14, 2018 sa may Provincial Road, Sitio Kabangcalan, Purok 5, Brgy. Sto. Niño, Carmen, Davao Del Norte.
Sa report gikan sa Police Regional Office kun PRO XI, giila ang biktima nga si Santos Sentelleas Samoranos, 65 anyos, Barangay kagawad ug residente sa purok Lasuerte, Brgy. Lapaz.
Sa inisyal nga imbestigasyon sa kapulisan sa Davao del Norte nga nagsakay matud pa si Samoranos sa iyang single nga motorsiklo gikan sa ilang balay padulong sa poblacion Carmen, Davao del Norte apan pag abot sa nasangpit nga incident area, duha ka mga wala mailhing suspek ang mipusil sa biktima sa makadaghang higayon nga naigo sa nagkadaitang parte sa kalawasan lakip na sa ulo.
Matud pa gidala pa ang biktima sa Municipal Rescuer Ambulance ngadto sa Carmen District Hospital apan gideklara na kining dead on arrival.
Sa karon, naglusad na og hot pursuit investigation ang kapulisan ug ginasuta ang motibo sa pagpusil-patay sa Brgy. kagawad.
RadyoMaN Renz Barbarona
