BUGAL SANG NEGROS | PNPA Valedictorian nga Kabankalanon nagpakigkita kay Gov. Alfredo Marañon Jr.

836

BACOLOD CITY – Nagpadulong sa Provincial Capitol si P/Inspector Fritz John Vallador 24, anyos, pumuluyo sang Sitio Buri, Barangay 4, ciudad sang Kabankalan para nga magcourtesy call kay Gov. Alfredo Marañon Jr.

Si Vallador ang nangin valedictorian sang PNPA Maragtas Class 2018.

Bilang bugal sang mga Negrense tuyo ni Vallador nga magsulod sa Special Action Force ukon SAF kag nakahanda sya nga i-assign sa bisan diin nga lugar sang Pilipinas.

Suno kay Vallador nga isa lamang sya ka ordinaryo nga persona apang may dako ini nga handom kag ang iya pagkuha sang pinakamataas nga honor sa PNPA amo ang nahauna nga halintang agud malab-ot nya ang iya mga handom.

Si Vallador nag eskwela paagi lamang sa mga scholarships nga iya nakuha bangud man sa kapigaduhon.

Suno pa sa iya nga nagdako ini nga wala nya nakita kag nakilala ang iya nga amay kabangdanan nga nagtinghuwa gid ini agud nga makatapos sa iya nga pagtuon.

Bilang pagpasidungog kay Vallador sa graduation rites sang PNPA sadtong Marso 21, nagbaton ini sang Plaque of Merit halin kay presidente Rodrigo Roa Duterte.

Nagpangako naman si Vallador nga magaserbisyo ini sang maayo kag tampad sa mga pumulyong Pilipinhon bilang alagad sang Philippine National Police.

Si Vallador ang mangin commencement speaker sang Bago City College bwas nga adlaw, Marso 27 la una sang hapon sa Bago City Coliseum sa diin dira sya una nagkolehiyo antis ini nakasulod sa PNPA.

Facebook Comments