Bullion Buyers Ltd. ginreklamo nagpang-into kag nagkolekta kwarta sa mga taga-Bacolod kag Negros, manggad sang mga Marcos ginpangako

BACOLOD CITY  –  Nag-ulan ang reklamo sang ginatos ka mga pumuluyo batuk sa isa ka recruitment company nga nag-into sa ila kag nag kolekta sang kwarta.

 

Pinaagi sa txt kag tawag sa DYHB – RMN Bacolod, ginsugid sang mga biktima nga ini sila ang gin recruit sang Bullion Buyers Limited pinaagi sa pagkuha sang photocopy sang ila mga ID, marriage contract kag birth certificate kag ginpabayad sang P40 tubtob P500 pesos para sa isa ka booklet.

 

Suno sa mga tagreklamo nga ginpasalig sila sang Bullion Buyers Limited nga kon sila ang makaparehistro, magabaton ang mga ini sang P10,000 pesos tagsa ka bulan sa sulod sang siyam ka tuig. 

 

Ginpasalig man sila nga makabaton sila sang 1 Million Pesos nga pagakuhaon naman sa manggad sang pamilya Marcos apang tubtub subong wala ini nagtupa.

 

Sa interview sang dyHB kay Punong Barangay Noli Villarosa sang Barangay Tangub, nga sa iya pagpangusisa sa pamilya Marcos paagi sa tawag, wala sang kaangay sini nga sistema sang paghatag sang financial assistance ang mga Marcoses.

 

Panawagan ni Villarosa nga indi gid magpati sa amu nga ‘modus’ bangod katuyuan gid lamang sini amu nga magpangolekta sang kwarta sa mga maintuan.

 

Base sa pagpangusisa sang DYHB, may kapin sa 100,000 naka mga tawo ang na recruit sang Bullion Buyers Limited sa Negros Occidental kag sa Bacolod City. /dyHB – BACOLOD

 

 

 


Facebook Comments