Walay kaso sa MERC-COV dinhi sa dakbayan sa Cagayan de Oro sukwahi sa migawas nga report nga gikaalarma sa katawhan.
Kini ang gibutyag ni Dr. Joselito Retuya sa City Health Office, kinsa kauban sa Department of Health o DOH Region 10 nga mihimo pag-imbistigar kalabot na sa gisuspetsahang carrier sa maong sakit.
Hinuon, giangkon ni Dr. Retuya nga wala pay gipagawas nga resulta ang DOH sa kaulohan, partikular na ang Research Institute for Tropical Medicine kon RITM kinsa mao lamang ang makasulti kon natakboyan ba ang usa ka pasyente.
Kini pinaagi sa pagsusi sa ilang gipadala nga specimen gikan sa maong giimbistigahang babaye nga naa karon sa Northern Mindanao Medical Center.
Ang maong babaye nakasinati matud pa og sintomas sa Merscov human kini miabot gikan sa Singapore.
Dugang pa ni Dr. Retuya nga gibana-banang sa adlawng Sabado pa mogawas ang resulta tungod kay mag-agad lamang sila sa pahibalo gikan sa DOH Reg. 10.
