Pagadian City – Nag-sorry ang Philippine National Police – Criminal Investigation and Detection Group gumikan sa sayop nga pagdakop sa betiranong magsusulat nga si Margarita Valle didto sa Laguidingan Airport kaniadtong Dominggo sa buntag.
Sa sulat sa CIDG, usa ka public apology ngadto kang Valle ang gipagawas niini gumikan sa kalangan nga ilang nabuhat kaniya.
Giangkon niini ang ilang sayop ang pagdakop sa betiranong tagsulat ug pagdala niini sa opisina sa CIDG dinhi sa syudad arun imbestigahan.
Gihangyo sa CIDG nga sabton ang ilang kahimtang gumikan kay warrant of arrest na ang ilang nadawat ug ang complainant lamang ang bugtong nakaila kung kinsa ang gikasulat sa warrant.
Aminado ang CIDG nga isip imbestigador angayan matud pa nila nga e-validate ang impormasyon nga ilang nadawat sa dili pa modakop sa usa ka indibidwal bisan pa man ang impormasyon magikan sa kasaligan nga tinubdan.
Gipaniguro sa PNP-CIDG nga dili na mausab pa ang maong kasaypanan ug misaad kini nga palambuon pa ang serbisyo nga ilang ihatag ngadto sa katawhan.
Mahinumduman nga gipili sa 61 anyos nga journalist nga magpabilin sa Bishop’s House sa Barangay Balangasan ning syudad sa Pagadian human gibuhian sa (CIDG) pasado 11:30 sa gabii niadtong domingo.
Si Valle gidakop sa Laguindingan Airport sa Misamis Oriental dihang na-alaan nga taas nga opisyal sa CPP-NPA nga dunay kasong quadruple frustrated murder base sa warrant nga pinitsahan December 2011.
Gibutyag usab sa labaw sa PNP nga P/Gen. Oscar Albayalde bisan isolated ang maong kaso naglusad usab sila og imbestigasyon aron masilutan ang nakalapas sa standard Operating Procedure kun SOP.
