MOISES PADILLA – Padayon karon nga ginakilala ang mga suspek nga nagpatay sa head sang civil defense unit sang banwa sang Moises Padilla kahapon sang hapon sa Brgy. Quintin Remo sang amo nga banwa.
Ginkilala ang biktima nga si Rusty Caramihan, legal ang edad kag pumuluyo sang Sitio Mamballo, Brgy. Quintin Remo, Moises Padilla.
Sa report nga nakalab-ot sa Negros Occidental Police Provincial Office, ginpahayag nga may mga la 1:45 kahapon sang hapon sa amo nga lugar, ang biktima sakay sang iya motor sang ini ang ginbanggaan sang anum tanan ka wala makilala nga suspek.
Ginpahayag nga armado ang amo nga mga lalaki kon diin ila ginpaarakan sang luthang ang biktima nga nag-angkon sang pila ka pilas sa nagkalain-lain nga bahin sang iya lawas.
Gindeclare dead on arrival ang biktima sang ini ang gindala sa Isabela District Hospital./dyHB BACOLOD
