General Santos City–gilauman ni Police Senior Superintendent Romeo Ruel Berango, kanhing labaw sa Gensan City Police Office nga ipadayon ni Police Senior Superintendent Raul Supiter ang iyahang mga programang nasugdan.
Apan iyahang gipaklaro nga isip mga opisyal aduna silay managlahing style sa pagdumala apan dako ang iyahang pagsalig nga kini alang sa kaayuhan sa kadaghanan.
Nakatakda usab siyang magpahigayon ug exit call kang Gensan City Mayor Ronnel Rivera aron nga personal nga magpasalamat sa suportang gihatag ngadto kaniya.
Manamilit usab kini sa uban pang opisyal sa dakbayan nga iyahang maabtan hilabi na nga sagad kanila ang nakabakasyon na gumikan sa semana santa aron nga mag-paabot sa iyahang pagpasalamat.
Dako man usab ang iyahang pagpasalamat sa hut-ong sa media gumikan sa suportang gihatag ngadto sa GSCPO ilalom sa iyang pagdumala ingon man sa mga komentaryo batok kaniya nga sumala pa gihimong niyang hagit aron nga maka-serbisyo pa ug sakto.(Dave Silagan)
