COMMUNITY OUTREACH GIKALIPAY SA MGA LUMAD SA SARANGANI

13

Dako ang kalipay sa mga kaigsoonang lumad sa probinsya sa Sarangani partikularminte sa Barangay Kinam sakop sa lungsod sa Malapatan human nga giduaw sila sa mga opisyales ug personahe sa Municipal Government sa Malapatan ug sa Provincial Government sa Sarangani dungan sa pagpahigayon og community outreach bitbit ang mga programa ug serbisyo sa lokal nga gobyerno.

Segun ni Barangay Kapitan Ruben Sumbo, dako nag kausaban sa ilang barangay sa Kinam human sa mga nahatag kanila nga kalambuan ug sa muabutay pa nga mga proyekto. Gani, sa grasya sa Ginoo, wala na matud pa namalit ang ilang mga residente og bugas sa merkado tungod bastante na sila sa ilang kaugalingong suplay sa palay ang ilang gipasigarbo nga organic upland rice gumikan sa programa nila Pangulong Rodrigo Duterte, kanhing Department of Agriculture secretary Manny Piñol, ug Governor Steve Chiongbian Solon gitawag nga SAAD kon Special Area for Agricultural Development nga nagpalambo sa upland rice sa mga kabukiran sa Sarangani Province, sa pagsuporta nila Vice Governor Elmer De Peralta, mga board member ug nila Senador Manny ug Congressman Ruel Pacquiao.


Ongoing nga ginasemento ang provincial road gikan sa Barangay Lun Padidu lahos na kini sa Barangay Upper Suyan, may pondo nga muabot og P170 Milyon ka pesos, apil nga maka-benipisyo pohon ang Barangay Daan Suyan ug ang Kinam.

Sa maong community outreach sa Kinam dungan sa selebrasyon sa ilang Tuke Fale Festival nga nagpasabot nga maayong ani/good harvest, wala pakyasa ni Malapatan Mayor Salway “Jun” Sumbo Jr. nga usa usab ka IP gikan sa tribong Blaan, nga personal saksihan ang maong aktibidad isip sya ang kapitan sa maong barangay kaniadto una kini nahimong municipal mayor human sa May 2019 midterm election.

Nagpasalamat si Mayor Sumbo sa tanang opisyales nga dakog gikatampo sa kalambuan sa Kinam ug sa tibuok Malapatan. Anaa matud pa sila Senador Manny ug Congressman Ruel Pacquiao ug Governor Solon maoy nagpabarog sa ilang barangay hall, barangay hall covered court ug ang covered court sa ilang eskwelahan sa Kinam.

Nanghinubra matud pa ang mga personahe ug mga serbisyo nga gidala sa Kapitolyo sa Kinam ilalum sa Sulong Sarangani program tungod anaa mismo ang mga department head nga incharge sa frontline services, sama sa Provincial Health Office, Provincial Engineering, OPAG Agriculture, PDRRMO ug PSWDO. Gipangunahan ang provincial team ni Engr. Gerald Faciol, ang assistant provincial administrator for operation, katugbang ang mga programa ug serbisyo nga dala usab sa LGU Malapatan ilalum sa Serbisyong Segurado program kuyog ang mga myembro sa Sangguniang Bayan sa pagdumala ni Vice Mayor Jean Delos Santos. Matud ni Mayor Sumbo, usa sa pinakamaayo nga kalihukan mao ang paghatud sa serbisyo sa lokal nga gobyerno ngadto sa komunidad aron direkta ug paspas makaduol ang mga tao.

Sa habig ni Governor Solon, iyang gihangyo atol sa bag-uhay lang nahuman nga Sarangani Provincial IP Day, nga padayong alalayan ug dasigon sa mga tribal leaders and professionals ang ilang mga igsoong tribu nga padayong maningkamot sa panginabuhi tungod nakasuporta lang kanila ang gobyerno. Hataas ang kawad-on sa IP community maong prayoridad gayud nila Governor Solon nga abrihan ang kabukiran aron masudlan pa kini sa daghang kaayuhan kauban sila Provincial Chieftain Edmund Pangilan ug IPMR Board Member Ben Donato.

Facebook Comments

From Advertisers