Cong Jerry Treñas, ginpasakaan sang kaso nga graft sa Sandiganbayan

299

ILOILO CITY – Kaso nga graft ang ginpasaka nga kaso sang Ombudsman sa Sandiganbayan batok kay Iloilo City Congressman Jerry Treñas.

Ang kaso may kaangtanan sa gina-alegar ma-anomaliya nga paghatag sang pondo ni Treñas sa Iloilo Press Club (IPC) sang alkalde pa ini sang syudad.

Base sa Ombudsman, nagpaggwa si Treñas sang pondo nga nagalab-ot sa P500,000.00 para sa pagtukod sang IPC sa Barangay San Pedro, Molo, Iloilo City.

Suno sa Ombudsman, wala dapat nag-intra ukon nagsulod si Treñas sa proyekto bangod indi man non-governmental organization nga accredited sang syudad ang IPC.

Bangod wala man sini namonitor ang proyekto, ginpahayag sang Ombudsman nga naglapas si Treñas sang pagsulundad sang Commission on Audit (COA).

Sa interview sang RMN Iloilo kay Atty. Jay-jay Justiniano, abogado ni Treñas, nagpamalibad ini nga ipatpat ang mga detalye sang kaso nga graft batok sang kongresista.

30 mil pesos nga piyansa ang ginrekomenda sang korte para sa temporaryo nga kahilwayan ni Iloilo City congressman Jerry Treñas.

Ginpahayag ni Justiniano nga mahimo naman magpiyansa si Congressman Treñas apesar nga wala pa maserbe ang warrant of arrest sa congressman.

Nagpanindugan naman si Atty. Justiniano nga wala sang sala kag wala man sang may ginkawat si anay Iloilo City Mayor kag karun Congressman Jerry Treñas.

Facebook Comments