Cong. Siao, Mayor Arnado, kanhi PIA Director General Clavite, nag home Quarantine human sila gikonsiderang PUM sa COVID

Naka-home quarantine karon sila si Iligan City Lone District Congressman Frederick Siao, Kauswagan, Lanao del Norte Municipal Mayor Rommel Arnado ug kanhi Director General sa Philippine Information Agency Harold Clavite sugod niadtong Sabado, Marso 14.

Kini tungod kay gikonsidera na sila’ng mga ‘persons under monitoring’ o PUM sa sakit nga COVID-19 o corona virus, human sa ilang biyahe gikan sa Metro Manila niadtong nakalabay’ng semana.

Si Siao nag-home quarantine sa iyang panimalay sa Barangay Sta. Filomena ning dakbayan, si Arnado sa Kauswagan samtang si Clavite sa Poblacion, Baroy, sa Lanao del Norte.


Sila si Arnado ug Clavite gikan nag-apil sa general assembly sa League of Municipalities of the Philippines o LMP niadtong nakalabay’ng semana, gawas pa sa mga meeting nga gi-apilan ni Arnado nga dunay kalabutan sa iyang pang-gobyerno.

Ang Metro Manila, human sa kumpirmado’ng kaso sa COVID-19 gikonsiderang ‘high risk’ ug ang tanan gikan didto, miingon ang Department of Health, kinahanglang mag-home quarantine sulod sa 14 ka adlaw.

Gibisita na ang tulo sa ilang matag Barangay Health Emergency Response Team o BHERT aron i-record ang ilang travel history ug kuhaon ang ilang body temperature.

Matag adlaw sulod sa 14 ka adlaw bisitahon sila sa BHERT aron i-monitor kung magpakita sila sa simtomas sa COVID nga hilanat, ubo ug lisod pag-ginhawa.

Human sa 14 ka adlaw nga mao ang quarantine period, hatagan sila og certification ayha makagawas sa ilang panimalay ug makapadayun sa trabaho.

Kining susamang proseso ang gibuhat sa ubang mga gikonsiderang PUMs. (Divina M. Suson, March 16). 

Facebook Comments