CONSEJAL MACROHON YA JURA YA NA FUESTO

Formalmente ya jura ya na fuesto el consejal Joselito “Lit Lit” Macrohon
como myembro del Sangguniang Panlungsod ta representa na Destrito Uno
enantes aga.

El mismo Congressista del Destrito Uno Celso Lobregat amo el ya
man-administer con el juramiento de Macrohon enantes na residencia de
Lobregat na Zone III en este ciudad.

Este desfues el Partido Laban ng Demokratikong Pilipino (LDP) donde myembro
y ya corre si Macrohon del pasao eleksyon oficialmente ya recivi ya con el
mga document de appointment desdel ofisina del Presidente Rodrigo Duterte
recientamente.


Si Macrohon ya jura con su fueste como consejal emfrente con el abogao Jose
Maria Saavedra y su esposa si Elaine Mary, y maga anak canda Job Eman,
Jamela Mae y Jenna Josaine Macrohon.

Na su descurso emfrente con el myembros del media, si Macrohon ya rendi
gracias con el Señor, con el Presidente Rodrigo Duterte por el su
appointment, con su familia, con el Congressista Celso Lobregat y su mga
uban na partido que ya suporta mucho conele.

Si Macrohon ya promete que continua el buen legacia que ya principia ele na
Barangay San Roque como barangay capitan del barrio.

Na Martes que viene hay sinta ya si Macrohon na session regular del
consejo.– Bhong Simbajon/RMN News

Facebook Comments