Construction worker, nakit-ang patay sulod sa giabangang kwarto sa Cagayan de Oro

Nakit-an na lamang patay nga naghigda sa iyang kwarto nga giabangan sa Western Kolambog, Brgy. Lapasan ning syudad ang 42 anyos nga construction worker.

Kini nailang si Renato Patindul, kinsa gituhoang giurom hinungdang wala na kini makamata kagahapong adlawa.

Matud ni Morita Baharla, ang tag-iya sa boarding house nga giabangan sa biktima nga mga alas onse niadtong miaging gabii dihang miuli kini gikan sa construction site nga gitrabahoan ug dayon mikaon.


Apan natingala na lamang sila nga wala na kini migawas sa iyang kwarto sukad kini nakauli ug natulog, hinungdang ila kining gitawag apan walay mitingog.

Tungod niini ilang gituktok ang kwarto ni Patindul apan wala gihapoy mitubag, busa gitulod sa silingang boarders ang pultahan sa kwarto niini ug mao na lamang ang ilang nakita nga patay na si Patindul.

Samtang sa laing bahin, walay nakitang foul play sa kamatayon ni Patindul tungod kay walay timailhan nga gipatay kini.

Kini ang gipahayag ni SPO1 Francis Michael Fortunado, ang inbistigador sa Agora Police Station busa nagtuo silang giurom ang biktima samtang natulog.

Gipangtawagan usab sa polis ang mga kaila sa biktima apan dili kini gapanubag.

Gawas niini, aduna usab kini laing mga pangalan nga maoy gibutang sa iyang ID, busa magsugot pa kini sa maong kwato.

Nasayran nga nagtrabaho sa DN Steel Marketing Incorporated si Patindol nga alang sa iyang mga higala nga usa kini ka maayong tawo ug walay kontra.

-o0o-

By: RadyoMaN Ellah Baculio & RadyoMaN Annaliza A. Reyes

Facebook Comments