COVID-19 infection rate sa Pilipinas, nananatiling mataas – OCTA Research

Patuloy na kumakalat ang COVID-19 sa iba’t ibang bahagi ng rehiyon sa bansa lalo na at nananatiling mataas sa 1 ang reproduction rate.

Ayon kay OCTA Research Team Fellow at University of the Philippines (UP) professor Dr. Guido David, ang kasalukuyang reproduction rate o “r-naught” sa bansa ay nasa 1.25, ibig sabihin aktibong kumakalat ang virus sa mga komunidad.

Dagdag pa ni David, ang pagtaas ng r-naught sa bansa ay dahil sa pagtaas ng bagong COVID-19 cases sa iba’t ibang bahagi ng bansa tulad ng Isabela, Benguet, Kalinga, Cebu, Davao at Misamis Oriental.


Tutol din siya na payagan ang mga batang may edad 10-taong gulang pataas na lumabas sa kanilang mga bahay.

Aniya, ang hakbang na ito ay tila ‘inconsistent’ sa polisya na nagbabawal sa face-to-face classes sa harap ng pandemya.

“Hindi nga natin sila pinapayagan na pumasok sa eskwelahan pero papayagan nating pumunta sa mall? Parang hindi naman consistent iyon. Gusto natin ma-stimulate ang economy pero there are other ways,” ani David.

Punto pa ni David, ang mga batang wala pa sa 16-anyos ay hindi pa maaaring makatanggap ng COVID-19 vaccines.

Facebook Comments