COVID-19 patient sa Valencia, naka-rekober na human nag-negatibo sa repeat test

Nakarekober na ang Kapitan sa Barangay Lumbayao siyudad sa Valencia gikan sa COVID-19.

Kini human nga nigawas na kagahapon ang resulta sa repeat test sa mao nga COVID-19 patient kung asa nag-negatibo na.

Nasayran nga siya ang nag-inusarang pasyente nga natakbuyan sa virus sa probinsya sa Bukidnon as of April 30.


Sa interview sa RMN ngadto kang Valencia City Vice Mayor Doctor Policarpo Murillo, ang co-chariman sa inter-agency task force on COVID-19, gibutyag niini nga bisan nga nag-negatibo na sa repeat test ang mao nga kapitan, ipadayon pa gihapon nila ang protocol sa quarantine.

Pasabot sa bise mayor nga bisan wala nay sintomas ang pasyente ila pa gihapon kini i-quarantine sulod sa 21 ka adlaw.

Magsugod ang pag-ihap sa 21 ka adlaw niadtong gikuha ang swab nga kaniadtong Abril 17 ning tuiga ug mahuman ang kwaratin karong Mayo 8.

Giklaro usab ni Vice Mayor Murillo nga wala nagpasabot nga nag negatibo na ang mao nga pasyente normal na ang tanan sa komunidad.

Sigun niya nga kinahanglan pa gihapon nga sundon ang GCQ kon New Normal nga gipatuman sa gobyerno.

Gipahinumduman ninii ang publiko nga kinahanglan tumanon pa gihapon ang pagsuot sa face masks, social distancing ug katunga lang sa kapasidad ang ipasakay sa public transport.

Gidugang niya nga pipila kini sa pamaagi aron mapugngan ang pagkatag sa coronavirus.

Facebook Comments