COVID-19 vaccines na gawa ng Pfizer, malaki ang tyansa na makakuha ng EUA

Malaki ang posibilidad na maisyuhan din dito sa bansa ng Emergency Use Authorization (EUA) ang bakunang gawa ng Pfizer-BioNTech.

Ayon kay Food and Drug Administration (FDA) Director-General Eric Domingo naaprubahan na kasi ng United Kingdom ang EUA ng Pfizer.

Ibig sabihin, nasuri na ito ng kanilang counterpart sa UK.


Pero paglilinaw ni Domingo, hindi basta-basta ibinibigay o ipinagkakaloob ang EUA dito sa Pilipinas at kailangan itong i-apply ng isang pharmaceutical firm at makapagpresenta ng mga kinakailangang dokumento at scientific data bago gawaran nito.

Kinakailangan ding maipakita ng nag-aaply na pharmaceutical firm na mabisa at epektibo ang bakuna sa mga Filipino o kahit sa mga Asyano.

Samantala, ikinalugod naman ng Palasyo ang naging hakbang ng United Kingdom na aprubahan ang COVID-19 vaccine ng Pfizer.

Ayon kay Presidential Spokesperson Harry Roque, binibigyan lamang nito ng pag-asa ang lahat na matutuldukan na ang kasalukuyang global health emergency.

Facebook Comments