COVID TF: Mga bakunado o di bakunado makatambong sa Misa de Gallo

Davao City – Hugot nga imonitor sa awtoridad ang pagtuman sa minimum public health standards batok Coronavirus Disease 2019 (COVID-19) partikular na sa mga mosalmot sa Misa de Gallo o Simbang Gabi nga gisugdan karong adlawa (December 16, 2021).

Giklaro ni Dr. Michelle Schlosser, Spokeperson sa Davao City COVID-19 Task Force (sa interbyu sa city-owned radio), walay palisiya nga bakunado lamang ang makasulod sa simbahan ug walay age restrictions ilawom sa COVID-19 Alert Level 2 diin gipailawom karon ang dakbayan.

Apan tambag ni Schlosser nga kung mamahimo, dili nalang ubanon ang dili pa bakunado batok COVID-19 sama sa 11-anyos paubos, ug kung ubanon man, kinahanglang istriktong sundon ang ginapatumang mga regulasyon.


“Wala man poy restriction sa age or restriction sa fully vaccinated or unvaccinated. However, we strongly advise everyone to follow the minimum public health standards kay naa gihapon ‘tay mga pulis didto, atong security and safety officers to check,” saysay ni Schlosser.

Una na usab nga gipahinumdom sa Davao City Police Office (DCPO) nga sundon ang mga patakaran sa mga motambong sa Simbang Gabi, diin magpatuman sila og palisiya nga “No Backpack”, “No Jacket” ug ang pagdili sa non transparent containers.

Labaw sa tanan, gipangayo sa DCPO ang kooperasyon sa Davaoeños kabahin sa Culture of Security sa syudad nga “May Nakita, Dapat Magsalita” usa ka anti-terrorism campaign alang sa luwas nga selebrasyon sa Kapaskohan.

RadyoMaN Kirby Manzon

<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments