Davao City- Arestado ang usa ka 18 anyos nga dalaga human nakuhaan og iligal nga droga sa gipahigayong buy-bust operation sa Davao del Norte Provincial Drug Enforcement Office of Philippine Drug Enforcement Agency Regional Office XI sa Purok 6, Barangay Ising, Carmen, Davao del Norte alas 7:10 kagabii, Nobyembre 13.
Ang dinakpan giila nga si Judie Oquias Sugatan, residente sa Purok 4, Barangay Sta. Maria, Nabunturan, Compostela Valley Province.
Naaresto si Sugatan sa dihang gipalitan kini sa usa ka PDEA agent nga nagpailang poseur buyer og kapin kun kulang 10 grams sa gituuhang shabu nga dunay kantidad nga 120,000 pesos.
Nakuha usab gikan sa possession sa dalaga ang usa ka cellphone ug buy-bust marked money.
Sa karon, balhog na sa PDEA XI detention facility ang dinakpan samtang gisumiter na ang nakuhang gituuhang shabu sa Laboratory Service alang sa qualitative ug quantitative examination.
Gina-andam na usab sa buhatan ang kasong ipasaka batok sa dinakpan nga Republic Act 9165 kun The Comprehensive Dangerous Drugs Act of 2002.
RadyoMaN Renz Barbarona
