iFM Laoag – Inrakurak ni Provincial Agrarian Reform Program Officer II Vic M. Ines nga agibunong ti Department of Agrarian Reform – Ilocos Norte kadagiti hauling truck kadagiti Agrarian Reform Beneficiaries Organizations wenno ARBOs iti probinsia.
Kuna ni Ines, babaen kadagitoy a truck, al-alisto ti pannakai-transport wenno pannakabunag dagiti produkto dagiti ARBOs.
Innayon ni Ines nga agserbi pay a pamastrekan dagitoy dagiti ARBOs gapu ta mabalinda nga iparenta kadagiti agkasapulan ti hauling truck.
Dagiti maikkan kadagiti truck ket dagiti sumaganad: Tambidao Multipurpose Cooperative ti Bacarra; Catangraran Agrarian Reform Cooperative ti Solsona; Namnama ARB Multipurpose Cooperative ti Piddig; ken Catuguing Multipurpose Cooperative ti San Nicolas.
Ti balor ti kada hauling truck a maited kadagiti nasao nga ARBOs ket agarup one million pesos.
Ti pannakaibunong dagitoy a pasilidad ket paset pay laeng ti Climate Resilient Farm Productivity Support Program ti DAR Ilocos Norte.
Bernard Ver, RMN News
