Davao: City of Dreams

Davao City – Subay sa datos sa Commission on Audit (CoA) sa 2017, apil ang Davao City sa listahan isip ika-siyam nga siyudad nga bilyonaryo in terms sa kinitaan human natala ang kapin P13B nga assets itandi sa Calamba City nga anaa sa Rank #10 nga dunay kapin P12B nga assets lamang.

Nagpabilin nga No. 1 sa ranking ang Makati City nga dunay total assets nga dul-an P200B ug ikaduha ang Quezon City nga dunay halos P100B nga assets.

Gibutyag ni First District Councilor Mabel Sunga-Acosta nga dili na mabintahaan ang siyudad sa Dabaw sa ubang lugar sa nasud kung ang hisgutan mao ang kalambuan sa ekonomiya isip bunga ug resulta sa lig-on nga liderato ug political will sa mga Duterte.


Apan daghan ang wala masayod hilabi na ang bag-ong henerasyon sa delubyo ug kalisdanan nga naagian sa siyudad ayha pa man hingpit nahatagan og katuman ang damgo sa mga namuno sama ni Pres. Rodrigo Duterte kinsa kanhi mayor sa siyudad sulod sa 23 anyos.

Pinasikad sa kasaysayan, ang Davao City usa na ka malamboan nga dapit diin niadtong panahona daghan na sa mga gambalay ang natukod dungan sa pag-uswag usab sa ubang mga lugar sa Pilipinas sugod sa kolonisasyon sa mga Kastila hangtud sa mga Amerikano atol sa 19th century pataas.

Apan ang pag-usbong sa ekonomiya sa dakbayan kalit nahagsa dihang misulod ang Japan sa nasud diin ang Davao City usa sa mga lugar nga gilunggaan sa mga Hapon niadtong 1940s.

Sa pagsilaob sa ikaduhang gubat sa kalibutan, daghan sa mga gambalay sa siyudad ang nagun-ob ug niadtong tungora, dili na mahulagway ang Dabaw gumikan sa kadaot nga gimugna sa giyera tali sa Hapon ug Amerikano uban ang mga sundalong Pinoy.

Dekada 50, subling mitindog ang mga tiil sa Dabaw ug mibangon kini gikan sa pagkahagsa sa ekonomiya ug kalamboan pinaagi sa tabang sa Estados Unidos sa hangtud nadeklarang Chartered City ang siyudad ubos sa kagamhanan ni Commonwealth President Manuel L. Quezon.

Apan daw paborito gayod sa mga pagsuway ang dakbayan dihang gipailawom sa balaud-militar ang kinatibuk-ang nasud diin niadtong tungora, walay hunong ang pagbaha og dugo gumikan sa matag karon og unya nga pamatay hangtud nabansagan og titulo ang Davao City isip kapital sa mga pinatyanay sa Asya.

Ang maong ngil-ad nga pangalan hatud sa presensiya sa rebeldeng hut-ong maoy nagpahugno sa ekonomiya hangtud na-ulahi sa kalamboan sa imprastraktura ug uban pang katikaran ang siyudad.

Tuig 1989, nakadaug sa piniliay sa pagka-mayor si Duterte kung asa nanaad ang kanhi piskal nga iyahang subling buhion ang hapsay ug kalinaw ug kalamboan sa siyudad.

Human sa 23 ka tuig, malampuson napabalik ni g Duterte ang nawala nga maayong kaugmaon sa siyudad human midagsa ang mga pamatigayon ug nagbaha ang mga kalambuan sa inprastraktura ug gumikan ani nakunsidera ang dakbayan isip sentro sa komersyo sa tibuok Mindanao.

Nunot sa damgo ug pangandoy sa mga opisyal nga mabalik ang maayong kinabuhi sa dakbayan niadtong 2011 nahatagan og pasidungog ang Davao City isip the ‘Most Livable City in Asia’ nga maoy gihikaw sa mga pagsuway sa nailhan unta nga ‘Land of Promise.’

Gisulti ni Acosta nga sa wala pa nahimong pangulo sa nasud si Duterte, kanunay ulahi ang isla sa Mindanao partikular ang dakbayan sa Dabaw sa kalamboang inprastraktura dili sama sa kaulohan nga buhong sa dakung pundo ug mga proyekto.

Matud ni Acosta, sukad nahimong pangulo sa Pilipinas si Duterte, nabati na sa mga taga-Mindanao ug labaw na sa mga Dabawenyo ang tinuod nga pagtagad sa kalambuan nga wala nakab-ot sa kanhi mga administrasyon.

Segun ni Acosta, kung kaniadto naglaway sa kalamboang inprastraktura ang Mindanao ug Davao City, karon wala’g tuo na ang mga proyekto karon sama sa mga bypass roads, coastal road, road widening projects, Mindanao Railway System, Davao-Samal Bridge ug uban pang dinagku nga mga proyekto.

Gidugang pa ni Acosta nga ang projection karon sa lokal nga kagamhanan alang sa mosunod pa nga mga katuigan mao nga isusama ang Davao City sa ubang mga nasud ug kabisera sa entero kalibutan nga moderno ang mga gambalay, mga transportasyon, teknolohiya ug daghan pang uban.

RadyoMaN Joel Viray

Facebook Comments