Davao transport sector vs curfew, liquor ban

22

Davao City – Dili makapasalig ang Southeastern Mindanao Diversified Drivers & Operators Cooperative (SEMDDOC) nga mobyahe ang ilang mga sakop pagtungtong sa alas-7:00 sa kagabhion panahon mo-epekto na unya ang subling pagpatuman sa curfew hour ug liquor ban dinhi sa syudad sugod October 15, 2020.

Gisugilon karon ni SEMDOCC President Manuel Duran nga ila nang gitugyan ngadto sa tagsa-tagsa ka mga operators ug sa ilang mga drivers ang desisyon kon mobiyahe pa ba gihapon sila o dili na sa takna nga mopaak na ang curfew hour ingon man liquor ban nga magsugod ugmang adlawa ug mahuman hangtod December 31 ning tuiga.

Gidugang ni Duran nga dili nila mapugos ang ilang mga sakop nga magbiyahe hilabi na nga anaa sa P5,000 ang multa sa LTFRB kon madakpan ang mga drivers nga mamasahero wala pay labot sa lugi sa pamasada, dugang maintenance cost ug presyo sa krudo matag adlaw.

Hinoon, sa pinasahi nga pamahayag nga giluwatan kagahapon sa LTFRB-XI, gitino niini nga exempted and tanang mga Public Utility Vehicles (PUVs) sama sa PUJs, taxi ug uban pa gikan sa maong regulasyon.

Gitambagan ni Duran ang mga trabahante nga mag-taxi na lamang kon maabtan sila og gabii sa pagpauli gikan sa ilang mga workplaces kay sigurado wala sila’y masakyan pa inig sugod sa curfew time.

Sa pikas bahin, giklaro ni City Tourism Operations Office (CTOO) head Generose Tecson nga nagpabiling gidili ang operasyon sa mga balay-kalingawan ug uban pa nga mangabli samot na karon nga gibanhaw pag-usab ang liquor ban.

Gidasig ni Tecson ang mga manginumay nga sa balay na lamang moinom ug dili sa gawas aron dili sila madakpan uban sa panghinaut nga matinud-anon ang tanan sa pagsunod sa health safety protocols.




Kahinumduman nga gimando ni Mayor Sara Duterte-Carpio ang pag-revive sa curfew hour ug liquor ban human nga mas misaka og maayo ang kaso sa COVID-19 dinhi sa dakbayan sukad giwagtang sa gobyernong lokal ang maong mga palisiya.

“Dili mi kaseguro niana (biyahe sa PUJ) basta dunay curfew hour kay mahadlok ang mga driver nga madakpan kay ang pinakagamay nga multa niana sa LTFRB-XI, P5,0000…So, ang atong mga pasahero dili na sila mag-asa (pa) sa PUJ, mao nang magsakay na lang sila og taxi,” sumala ni Duran.

RadyoMan Joel Viray

Facebook Comments