DAVSUR ROAD CRASH: SUV vs motor, 5 angol

87

Davao City – Nagpadayon karon ang imbestigasyon sa Magsaysay Municipal Police Station labot sa latest disgrasya sa kadalanan sa may Purok 5, Barayong, Magsaysay, Davao del Sur tali sa usaka SUV ug motorsiklo nahitabo bandang alas-6:40 sa buntag.

Atol sa interbyu sa DXDC RMN Davao kang Master Sergeant Ramil Locostales, traffic investigator, gibutyag niini nga ang SUV gimaneho sa usa ka Mark Pontillap, taga Poblacion, Magsaysay Davao del Sur diin sakay usab ang pito niya ka mga miyembro sa pamilya samtang ang motorsiklo gimaneho ni Victorino Tahil angkas ang iyang 16 anyos nga anak nga si Welvin Tahil.

Sa imbestigasyon sa Magsaysay Municipal Police Station, nasayrang gikan sa Magsaysay paingon sa Bansalan ang motorsiklo samtang padulong usab sa Magsaysay gikan sa Bansalan ang SUV.

Wala naka-brake ang driver sa SUV, gani nadiretso kini sa pikas lane rason nga nabanggaan niini ang motorsiklo ug na-diretso sa usaka Indian tree gilid sa highway dayon lahos sa basakan nga bahin resulta sa grabeng pagkalumping sa atubangan nga bahin sa maong sakyanan.

Saysay ni Locostales, tulo ang na-injured sa mga sakay sa SUV ilabi na ang driver ingon man ang duha ka mga sakay sa motor kinsa pulos gipangdala sa pinakaduol nga balay-tambalanan.

Kung mapamatud-an nga guilty ang driver sa SUV, kasong ‘Reckless Imprudence Resulting to Serious Physical Injury’ ang atubangon niini.

RadyoMaN Jason Amisola




Facebook Comments