DCPO duna nay person of interest sa pagpatay kang PO3 Garol

Davao City- Duna nay nakuhang pangalan kun person of interest ang Davao City Police Office kun DCPO nga maoy gituuhang suspek sa pagpusil-patay sa usa ka pulis sa Tugbok ning syudad sa Davao kagahapong adlawa.

Giila ang biktima nga si PO3 Wlfredo Garol, 34 anyos, residente sa Calinan ning syudad og nadestino sa Baguio District Police Station isip intel operative.

Sumala ni DCPO Spokesperson PSI Ma. Teresita Gaspan, padayon ang ilang imbestigasyon sa maong panghitabo gani sa gihimong autopsy, nakahiagum ang biktima og walo ka samad pinusilan ug posibleng misurender pa unta ang pulis sa mga suspek apan gipaulanan gihapon kini og bala hinungdan sa pagkamatay niini.


Nagpahimangno usab ang DCPO ngadto sa ilang mga sakop nga pahugtan ang seguridad ug mag doble alerto sa ilang area of responsibility ug kanunay nga mag-igmat ilabi na sa mga gi-identify nga “red area” dinhi sa syudad sa Davao.

Dugang niini, gikondena ni Police Regional Office-XI Regional Director PCSupt Manuel Gaerlan ang pagpatay sa gisuspetsahang mga Lawless Armed Group kang PO3 Garol nga sumala pa usa ka maayong public servant, police officer ug mahigugmaon nga bana.

Kahinumduman nga bandang alas 7:45 kagahapon sa buntag, gi-ambush- patay ang biktima sa Purok 5, Sitio Luman, Brgy New Valencia, Tugbok District samtang pauli gikan naghatod sa iyang asawa sa eskwelahan.

RadyoMaN Don Pulayao

Facebook Comments