DENR-Bukidnon, nagpahimangno batok sa mga magbutang sa election campaign posters sa mga kahoy

Nagpahimangnu ang Department of Environment and Natural Resources (DENR)-Bukidnon sa mga kandidato sa election karong May 9, 2022 ug sa ilang mga tagasuporta nga likayang magbutang og campaign materials sa mga kahoy.

Sa interview sa RMN Malaybalay ngadto kang Provincial Environment and Natural Resources Officer Virgilino Alima, gibutyag niini nga bantayan ug pagbawalan ang mga kandidato nga maglansang sa ilang mga campaign materials sa tanang mga kahoy.

Gidugang pa ni Alima nga ang Commission on Elections (COMELEC), pinaagi sa Fair Elections Act, angayang didto lamang ibutang sa mga designated common poster areas ang mga campaign materials.

Nakalatid usab matud pa sa COMELEC Resolution No. 10730 Sec. 21 nga ang kinsa mang kandidato nga magbutang sa campaign materials sa mga kahoy ang patubagon ilawom sa balaod.

Sumala sa opisyal nga gibawal usab sa Republic Act 3571 ang pagputol, pagdaut sa mga nakatanom o gatubo nga kahoy, gapamulak nga tanom, ug shrubs o mga tanom nga dakog bili sa mga pampublikong kalsada, sa mga plaza, parke, tulunghaan, o sa bisan asang lugar nga laaganan.

Gisulti usab niya nga ang makalapas niini posibleng mag-atubang sa pagkapriso sulod sa unom ka bulan hangtud duha ka tuig, o multa nga dili muubos sa P500.00 ug dili mulapas sa P5,000.00, o kapareho, base sa Section 3 sa Presidential Decree 953.

Facebook Comments