DepEd: Apektado sa pagpasira sa Salugpongan schools atimanon

28

Davao City – Gisiguro sa Department of Education (DepEd) nga makapadayon gihapon sa pagtungha ang mga estudyante’ng naapektuhan human nga gisuspinde sa DepEd ang operasyon sa mga tulunghaan nga gipanag-iyahan sa Salugpungan Ta’tanu Igkanugon Learning Center Inc. (STTILCI) sa Davao del Norte.

Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gisaysay niini nga andam nga mudawat ang kasikbit nga mga tulunghaan aron makapadayon gihapon sa pagtungha ang mga kabataan.


“Gimando ngadto kanila mao ang pag facilitate sa enrollment sa ilang mga bata or mga leaners ngadto sa mga silingan nga pampublikong tulunghaan aron magpadayon ang pag eskwela niining maong mga kabataan samtang gipahamtang pa nato kining suspension order,” saysay ni Atillo.

Dugang ni Atillo nga mamahimo usab nga mo-apply sa duol nga public schools ang mga magtutudlo nga naapektuhan sa maong direktiba.

“Sila usab gihangyo nga isip provisional measure, i-encourage ‘tong ilang mga magtutudlo kansang pangempleyo posibleng naapektuhan niining order karon sa departamento sa edukasyon nga mo-apply sa pinakaduol nga DepEd schools,” segun ni Atillo.

Kahinumduman nga gisuspinde ang operasyon 55 ka mga tulunghaan nga gipadagan sa STTILCI sa tibuok rehiyon onse subay sa direktiba sa DepEd central office subay sa report nga padayong ginatudlo sa mga kabataan ang idolohiya batok sa gobyerno diin kini giingong ginapadagan sa grupo sa mga kumunista.

RadyoMaN Kirby Manzon

Facebook Comments

From Advertisers