DILG 12 gikumpirma nga walay Kapitan sa Barangay sa rehiyon nga nakahimo ug anomaliya sa SAP

26

South Cotabato—Walay bisag usa ka Barangay Kapitan sa Rehiyon Dose ang naapil sa listahan sa mga barangay opisyal nga gipasuspendi ug unom ka bulan sa Office of the Ombudsman gumikan sa anomaliya sa distribution sa Social Amelioration Program kon SAP.

Kini ang gikumpirma ni Department of Interior and Local Government Regional Director Josephine Leysa. Subay sa datus sa DILG anaa sa 89 ka mga Kapitan sa nasud ang nasuspende tungod sa anomaliya sa implementasyon sa unang hugna sa Social Amelioration Program (SAP). Matud kang Director Leysa, ang nahitabong mass suspension ang maoy pinakaunang nahitabo sa kasaysayan sa nasud ug nagtuo kini nga ginahimo lamang sa DILG ang saad nga hinluan ang ahensya ug pakgangon ang mga kurakot nga opisyal nga gapahimulos sa kwarta sa gobyerno.

Kalabutan niini, hugtanon usab nga nagpasalamat si RD Leysa sa tanan nga mga field officers sa ahensya ug Local Chief Executives nga nitabang sa mga Barangay Kapitan nga masiguro nga sakto ang distribusyon sa SAP. Pagpaklaro pa sa Regional Director nga adunay mga reports kalabutan sa gialigar nga anomaliya sa distribusyon sa SAP sa Rehiyon, apan base sa imbestigasyon, gilayon man nga naaksyunan ug sakto man ang nahimong distribusyon.

Kahinumduman nga gimando sa pamunuan sa DILG sa PNP-CIDG nga magfile ug criminal cases batok sa 447 ka mga indibidwal sa kalapasan sa RA 3019 (Anti-Graft and Corrupt Practices Act), RA 11469 (Bayanihan Act I), ug RA 6713 (Code of Conduct of Government Officials and Employees) ug uban pa kalabutan sa implementasyon sa Social Amelioration. Base sa datos sa 447 suspects, 211 ang elected local ug barangay officials, 104 ang appointed barangay officials ug 132 ang sibilyan nga kakonsabo. Sa kasamtangan ang kaso ang anaa na sa tagsa tagsa ka mga city ug provincial prosecutors.

Facebook Comments